INTERNET VA PICHOQ yoxud oddiy hayotiy qarashlar

Internet yovuzlikmi, ezgulik? U foydalimi yoki zararli? Undan qochish kerakmi yoki quchoq ochib kutib olish kerakmi?  Bugun “Kelajak ovozi” Media oromgohida yosh jurnalistlar uchun o’tkazilgan ilk trening davomida  qatnashchilar ana shu savolga javob izladilar. Har kimda turlicha fikr, turlicha qarash. Kimdir bu yo’nalishda  cheklovlar e’lon qilish kerak degan bo’lsa,  kimdir  internetni insonlarni dangasalikka yetaklashda  aybladi. Mening esa bu savollarga  javobim tayin. Nazarimda,  hayotda hamma narsa nisbiy.  Bu faqatgina mening  fikrim emas,  aslida  ham shunday. Axir, nimaiki  bo’lmasin, uning ijobiy jihati  bo’lganidek, salbiy jihati  ham  albatta bo’ladi.  Uni  qay  tomonga yo’naltirish, qanday foydalanish o’zimizga, ha ha, faqat o’zimizga bog’liq. Bildirib o’tilgan  barcha  fikrlarga xulosa  sifatida  O’z MU Internet jurnalistika kursi dekani   Sherzod Qudratxo’jayev tomonidan aytilgan yakuniy  fikrlar ko’pchilikning  diqqat-e’tiborini tortdi desam, mubolag’a bo’lmas:

 “Menimcha internet-bu  jihoz  ya’ni  ish quroli. Deylik,  oddiy pichoq,  u  oshpaz uchun oshxona jihozi, uning  yordamida mazali taomlar tayyorlanadi,  qotil qo’lida esa  u qurolga aylanadi”.

Nazarimda, ana shunday oddiy, hayotiy tarzda  aytilgan fikrlar insonlarga tezroq yetib boradi, yanada ko’proq o’ylashga majbur qiladi. Huddi  shu kabi  ushbu  trening  jarayonida  trenerlar so’zning ana shunday qudratidan o’rinli foydalana olishdi. 

  Bundan tashqari yana bir malakali trener  O’zMU Oliy jurnalistika kursi dekani  Beruniy Alimov  o’quv mashg’uloti davomida  Xalqaro  jurnalistika  haqida  bilganlarini ishtirokchilar bilan o’rtoqlashdi hamda olingan bilim va  tajribalar amalda interfaol usulda sinab ko’rildi. Qolaversa, chet davlatiga jurnalist sifatida tashrif buyurganda, dastlab kimga  yoki qayerga murojaat  qilish kerakligi, akkretatsiyadan o’tish  borasida  ham ma’lumotlar taqdim etildi. Shuni alohida  aytib o’tish kerak-ki ,  trenerlarimizning ijodiy  faoliyati va hayoti davomida orttirgan ulkan tajribasi  barchamizga maktab vazifasini  o’taydi.  Hususan,  Beruniy Alimov  dunyoning 22 davlatida bo’lgani va ularning 8tasida  doimiy faoliyat  yuritgani haqida so’zlab  berganida o’z-o’zidan jurnalistika  sohasiga bo’lgan qiziqish  yanada ortishi tabiiy.

Ana shunday qaynoq  jarayonlar davomida toblanayotgan bo’lajak jurnalistlar  kelajakda yetuk mutahassis bo’lib yetishishlarida “Kelajak ovozi” Media Oromgohining o’z o’rni bo’lishiga ishonaman.